مسئلہ کشمیر کا پائیدار حل جنوبی ایشیا میں امن کے لیے ناگزیر ہے
مسئلہ کشمیر کا پائیدار حل جنوبی ایشیا میں امن کے لیے ناگزیر ہے: اقوام متحدہ میں پاکستانی مندوب
اقوام متحدہ، نیویارک (24 نیوز) – اقوام متحدہ میں پاکستان کے مستقل مندوب عاصم افتخار احمد نے واضح کیا ہے کہ مسئلہ کشمیر کے حل کے بغیر جنوبی ایشیا میں دیرپا امن ممکن نہیں۔ انہوں نے یہ بات عرب گروپ کے سفیروں کو جنوبی ایشیائی خطے میں حالیہ کشیدہ صورتحال پر بریفنگ دیتے ہوئے کہی۔
بھارتی اقدامات بین الاقوامی قوانین کی خلاف ورزی ہیں
عاصم افتخار احمد نے سفیروں کو آگاہ کیا کہ بھارت کی جانب سے سندھ طاس معاہدے کی یکطرفہ معطلی اور دیگر جارحانہ اقدامات نہ صرف اشتعال انگیز ہیں بلکہ یہ بین الاقوامی قوانین اور اقوام متحدہ کے چارٹر کی کھلی خلاف ورزی کے مترادف ہیں۔
انہوں نے کہا کہ بھارت کی جانب سے کی گئی جارحیت کے خلاف پاکستان کا ردعمل اقوام متحدہ کے چارٹر کے مطابق اپنے دفاع کے حق میں ایک متناسب اقدام تھا۔
پاکستان کا پرامن حل پر یقین
پاکستانی مندوب نے عرب ممالک کے سفیروں کو یقین دلایا کہ پاکستان لائن آف کنٹرول پر جنگ بندی برقرار رکھنے اور کشیدگی میں کمی کے لیے ہر ممکن پرامن اقدامات کر رہا ہے۔ ان کا کہنا تھا کہ پاکستان خطے میں امن کے فروغ کے لیے سنجیدہ اور ذمہ دارانہ کردار ادا کر رہا ہے۔
سلامتی کونسل کی قراردادوں پر عمل درآمد ضروری
جموں و کشمیر کے تنازع پر بات کرتے ہوئے انہوں نے کہا کہ یہ مسئلہ اقوام متحدہ کی سلامتی کونسل کی قراردادوں اور کشمیری عوام کی امنگوں کے مطابق حل ہونا چاہیے۔ جب تک اس دیرینہ تنازعے کو منصفانہ طور پر حل نہیں کیا جاتا، جنوبی ایشیا میں پائیدار امن کا خواب شرمندۂ تعبیر نہیں ہوسکتا۔
Comments
Post a Comment